Vebsayt qurduqdan sonra ilk 10 SEO addımı

Sayt hazır oldu, dizayn bəyənildi, məhsullar yükləndi. Bir ay keçir — Google-dan bir nəfər də gəlmir. Bu, bizə ən çox gələn şikayətdir və səbəbi demək olar həmişə eynidir: sayt qurulub, amma heç kim onu axtarış sistemlərinə təqdim etməyib.

Aşağıdakı 10 addım tam olaraq bu boşluğu doldurur. Ardıcıllıq vacibdir — yuxarıdan aşağı gedin.

1. Saytın indekslənməsinə icazə verin

WordPress-də sayt qurularkən çox vaxt Parametrlər → Oxuma → «Axtarış sistemlərinin saytı indeksləməsini əngəllə» qutusu işarələnmiş qalır. Bu bir qutu ucbatından aylarla gözləyən saytlar görmüşük. Birinci iş budur.

2. robots.txt və sitemap faylını yoxlayın

saytiniz.com/robots.txt ünvanını açın. Orada Disallow: / sətri varsa, bütün sayt bağlıdır. Eyni zamanda sitemap ünvanının göstərildiyinə əmin olun — adətən /sitemap_index.xml.

3. Google Search Console-a qoşun

Saytı təsdiqləyin və sitemap-ı göndərin. Bu, Google-a «mən buradayam» demənin ən birbaşa yoludur. Üstəlik hansı sorğularda göründüyünüzü yalnız buradan görəcəksiniz.

4. Bing Webmaster Tools-u unutmayın

Azərbaycanda demək olar heç kim bunu etmir və bu, böyük səhvdir. ChatGPT və digər süni intellekt alətlərinin axtarışı böyük ölçüdə Bing indeksinə söykənir. Bing-ə qoşulmamısınızsa, AI cavablarında görünmək şansınız praktiki olaraq sıfırdır. Search Console-dan birbaşa import etmək olur, 5 dəqiqə çəkir.

5. Hər səhifəyə başlıq və təsvir yazın

Title və meta description Google nəticələrində görünən yeganə mətndir. Avtomatik yaradılan variantla kifayətlənməyin — hər əsas səhifə üçün əl ilə yazın. Title 55–60 simvol, təsvir 150–160 simvol ətrafında olsun.

Bu hissəni dərindən öyrənmək istəyirsinizsə, on-page SEO bələdçisi başlıq strukturundan açar söz yerləşdirməsinə qədər hər şeyi izah edir.

6. Başlıq strukturunu düzəldin

Hər səhifədə yalnız bir H1 olmalıdır və o, səhifənin mövzusunu deməlidir. Qalan bölmələr H2, onların altındakılar H3 olur. Çox temada dizayn naminə H başlıqları qarışdırılır — bu, axtarış sistemi üçün səhifənin məntiqini pozur.

7. Şəkilləri yüngülləşdirin və alt mətn yazın

Yeni saytların ən çox yayılmış problemi ağır şəkillərdir. Şəkilləri WebP formatına keçirin, ölçüsünü ekran ölçüsünə uyğunlaşdırın və hər şəklə alt mətn yazın. Alt mətn həm əlçatanlıq, həm də şəkil axtarışından gələn trafik üçündür.

8. Daxili linkləri qurun

Yeni saytda səhifələr adətən bir-birindən təcrid olunmuş vəziyyətdə olur. Hər səhifədən məntiqi olaraq bağlı digər səhifələrə link verin. Bu həm istifadəçini saytda saxlayır, həm də axtarış sisteminə səhifələr arasındakı əlaqəni öyrədir.

9. Schema (strukturlu məlumat) əlavə edin

Schema axtarış sisteminə səhifənin nə olduğunu açıq deyir — məhsul, məqalə, biznes, kurs. Bu, həm Google nəticələrində zəngin görünüş şansı yaradır, həm də süni intellekt sistemlərinin məzmunu düzgün başa düşməsinə kömək edir.

10. Məzmun yazmağa başlayın

İlk doqquz addım saytı yarışa buraxır. Qalib gəlmək isə məzmunla olur. Müştərilərinizin verdiyi sualları yazıya çevirin — hər cavab bir səhifədir, hər səhifə yeni bir giriş qapısıdır.

SEO-nu sıfırdan anlamaq istəyirsinizsə, komandamızın SEO istiqamətini aparan Kanan Nasibov bu sahəni öz saytında addım-addım izah edir — SEO nədir bələdçisindən başlayın, texniki tərəf üçün isə texniki SEO auditi yazısına baxın.

Nə qədər vaxt aparır?

İlk doqquz addım bir-iki gündə bitir. Nəticə isə dərhal gəlmir: yeni sayt üçün Google-un etibar qazanması adətən 3–6 ay çəkir. Bu müddətdə ən pis qərar «işləmir» deyib dayanmaqdır — çünki effekt məhz həmin dövrdən sonra başlayır.

Sayt qurmağı planlaşdırırsınızsa vebsayt yaradılması xidmətimizə, SEO-nu bizə həvalə etmək istəyirsinizsə SEO xidmətimizə baxa bilərsiniz.